முன்னாள் ஜனாதிபதி ரணில் விக்ரமசிங்கவை குற்றப் புலனாய்வுத் திணைக்களம் (CID) கைது செய்தமை, இலங்கை வரலாற்றில் நிறைவேற்று அதிகாரம் கொண்ட ஜனாதி...
முன்னாள் ஜனாதிபதி ரணில் விக்ரமசிங்கவை குற்றப் புலனாய்வுத் திணைக்களம் (CID) கைது செய்தமை, இலங்கை வரலாற்றில் நிறைவேற்று அதிகாரம் கொண்ட ஜனாதிபதி ஒருவர் கைது செய்யப்பட்ட முதல் சம்பவமாக பதிவாகியுள்ளது.
இன்று (22) மதியம், ரணில் விக்ரமசிங்க குற்றப் புலனாய்வுத் திணைக்களத்தினால் கைது செய்யப்பட்டார்.
தனக்கு எதிராக நடத்தப்படும் விசாரணை தொடர்பாக வாக்குமூலம் அளிப்பதற்காக இன்று காலை குற்றப் புலனாய்வுத் திணைக்களத்திற்கு வந்தபோது அவர் கைது செய்யப்பட்டார்.
ரணில் விக்ரமசிங்க தனது ஜனாதிபதி பதவிக் காலத்தில் அரசாங்க நிதியைப் பயன்படுத்தி, தனது மனைவி பேராசிரியர் மைத்ரி விக்ரமசிங்கவின் பட்டமளிப்பு விழாவில் கலந்து கொள்ள லண்டன் சென்றது தொடர்பாக குற்றப் புலனாய்வுத் திணைக்களம் விசாரணையைத் தொடங்கியது.
இது தொடர்பான ஆதாரங்களை 2025 ஜூன் 24 அன்று கோட்டை நீதவான் நீதிமன்றத்தில் குற்றப் புலனாய்வுத் திணைக்களம் சமர்ப்பித்தது.
விசாரணையின் ஒரு பகுதியாக, முன்னாள் ஜனாதிபதியின் தனிப்பட்ட செயலாளராகப் பணியாற்றிய சாண்ட்ரா பெரேரா மற்றும் முன்னாள் ஜனாதிபதியின் செயலாளர் சமன் ஏகநாயக்க ஆகியோரிடமிருந்து குற்றப் புலனாய்வுத் திணைக்களம் வாக்குமூலங்களைப் பதிவு செய்தது.
ரணில் விக்ரமசிங்கவின் அரசியல் பயணம்:
பிறப்பு: 1949 மார்ச் 24.
ஆரம்ப அரசியல் வாழ்க்கை: 1970களின் நடுப்பகுதியில் களனி தொகுதியில் ஐக்கிய தேசியக் கட்சியின் தலைமை அமைப்பாளராக தனது அரசியல் வாழ்க்கையைத் தொடங்கினார்.
பின்னர் பியகம தொகுதியின் தலைமை அமைப்பாளராக நியமிக்கப்பட்டார்.
பாராளுமன்ற உறுப்பினர்: 1977 இல் முதன்முதலில் பாராளுமன்ற உறுப்பினராகத் தேர்ந்தெடுக்கப்பட்டு, ஜே.ஆர். ஜெயவர்தன அரசாங்கத்தில் இளைய அமைச்சராக இளைஞர் விவகாரம் மற்றும் வேலைவாய்ப்பு அமைச்சராகப் பணியாற்றினார்.
முக்கிய பதவிகள்: 28 வயதில் வெளிவிவகார பிரதி அமைச்சர். இளைஞர் விவகாரம், கல்வி, தொழில், அறிவியல் மற்றும் தொழில்நுட்ப அமைச்சர்.
1989 மார்ச் 6 முதல் 1993 மே 7 வரை பாராளுமன்ற அவைத் தலைவர்.
1994-2001 மற்றும் 2004-2015 வரை எதிர்க்கட்சித் தலைவர்.
பிரதமர் பதவிகள்:
முதல் முறை: 1993 மே 7 - 1994 ஓகஸ்ட் 19.
இரண்டாவது முறை: 2001 டிசம்பர் 9 - 2004 ஏப்ரல் 2.
மூன்றாவது முறை: 2015 ஜனவரி 9 - 2015 ஓகஸ்ட் 21.
நான்காவது முறை: 2015 ஓகஸ்ட் 24 - 2018 அக்டோபர் 26.
ஐந்தாவது முறை: 2018 டிசம்பர் 16 - 2019 நவம்பர் 21.
ஆறாவது முறை: 2022 மே முதல் 2022 ஜூலை வரை (மஹிந்த ராஜபக்ஷவின் ராஜினாமாவுக்குப் பின்).
ஜனாதிபதி பதவி:
2022 ஜூலை 15 முதல் தற்காலிக ஜனாதிபதியாக பதவியேற்றார்.
2022 ஜூலை 20 அன்று இலங்கையின் 8வது நிறைவேற்று ஜனாதிபதியாக தலைமை நீதிபதி ஜயந்த ஜயசூரிய முன் பதவியேற்றார்.
