இலங்கை தமிழ் அரசுக் கட்சியின் தலைவர் பதவி உள்ளிட்ட பொறுப்புக்களில் இருந்து விலகுவதாக மாவை சேனாதிராஜா கட்சியினருக்கு அறிவித்துள்ளார். கட்சியி...
இலங்கை தமிழ் அரசுக் கட்சியின் தலைவர் பதவி உள்ளிட்ட பொறுப்புக்களில் இருந்து விலகுவதாக மாவை சேனாதிராஜா கட்சியினருக்கு அறிவித்துள்ளார்.
கட்சியின் புதிய தலைவராக தலைவராக தெரிவு செய்யப்பட்ட சிவஞானம் சிறீதரனுக்கு கடிதம் அனுப்பியுள்ள மாவை சேனாதிராஜா தலைமை பொறுப்பை ஏற்குமாறும் கோரியுள்ளார்.
கடிதத்தின் பிரதி கட்சியின் பதில் பொதுச் செயலாளர் ப.சத்தியலிங்கத்துக்கும் அனுப்பப்பட்டுள்ளது.
எதிர்வரும் பொதுத்தேர்தலில் தமிழரசுக்கட்சி சார்பில் யாழ் தேர்தல் மாவட்டத்தில் போட்டியிடவிருக்கும் வேட்பாளர்களின் பெயர் பட்டியல் அண்மையில் வெளியிடப்பட்ட நிலையில், அதுகுறித்து கட்சியின் சிரேஷ்ட உறுப்பினர்கள் பலரும் அதிருப்தியடைந்திருந்த பின்னணியில் தமிழரசுக்கட்சியின் தலைவர் மாவை சோ.சேனாதிராஜா நேற்று (07) கட்சித் தலைவர் பதவியில் இருந்து விலகுவதாக கடிதம் மூலம் அறிவித்தார்.
எதிர்வரும் நவம்பர் மாதம் 14 ஆம் திகதி நடைபெறவிருக்கும் பாராளுமன்றத்தேர்தலில் இலங்கைத் தமிழரசுக்கட்சியின் சார்பில் யாழ்.தேர்தல் மாவட்டத்தின் போட்டியிடவிருக்கும் வேட்பாளர்களின் பெயர்கள் அக்கட்சியின் தேர்தல் நியமனக்குழுவினால் கடந்த ஞாயிற்றுக்கிழமை அறிவிக்கப்பட்டது.
அதன்படி யாழ்ப்பாணம் மற்றும் கிளிநொச்சி மாவட்டங்களுக்கான வேட்பாளர்களாக எஸ்.சிறிதரன், எம்.ஏ.சுமந்திரன், எஸ்.சி.சி.இளங்கோவன், கேசவன் சயந்தன், சந்திரலிங்கம் சுகிர்தன், சுரேக்கா சசீந்திரன், இம்மானுவல் ஆர்னோல்ட், கிருஸ்ணவேணி சிறிதரன், தியாகராயா பிரகாஷ் ஆகியோர் பெயரிடப்பட்டனர்.
இருப்பினும் அப்பெயர் பட்டியலில் பெரிதும் எதிர்பார்க்கப்பட்ட தமிழரசுக்கட்சியின் சிரேஷ்ட உறுப்பினர்களின் பெயர்கள் உள்வாங்கப்பட்டிருக்கவில்லை. இதனையடுத்து கட்சியின் சிரேஷ்ட உறுப்பினர் ஜனாதிபதி சட்டத்தரணி கே.வி.தவராசா தமிழ் அரசுக் கட்சியிலிருந்து விலகுவதாக ஞாயிற்றுக்கிழமை அறிவித்தார்.
அவர் மாத்திரமன்றி கட்சியின் மேலும் சில சிரேஷ்ட உறுப்பினர்களும் இவ்வேட்பாளர் பட்டியல் தொடர்பில் கடும் அதிருப்தியடைந்திருந்த நிலையில், தமிழரசுக்கட்சியின் தலைவர் மாவை சோ.சேனாதிராஜா கட்சி தலைவர் பதவியிலிருந்து விலகுவதாக கடிதம் மூலம் அறிவித்துள்ளார்.
இதேவேளை மாவை சேனாதிராஜாவை கட்சியின் தலைவர் பதவியில் தொடர வைப்பதற்கான சமரச முயற்சிகள் மேற்கொள்ளப்பட்டு வருவதாக தகவல்கள் தெரிவிக்கின்றன.
இதேவேளை தமிழ் அரசுக் கட்சியின் தலைவராக தெரிவு செய்யப்பட்ட சிவஞானம் சிறீதரன் தலைவராக செயற்பட நீதிமன்றம் இடைக்கால தடை விதித்துள்ளதுடன் வழக்கு நடைபெற்று வருகின்றமை குறிப்பிடத்தக்கது.
அதேவேளை எதிர்வரும் பொதுத்தேர்தலில் தமிழரசுக்கட்சி சார்பில் யாழ் தேர்தல் மாவட்டத்தில் போட்டியிடவிருக்கும் வேட்பாளர்களின் பெயர் பட்டியலில், மக்கள் மத்தியில் செல்வாக்குடைய சிரேஷ்ட உறுப்பினர்களின் பெயர்கள் ஏன் உள்வாங்கப்படவில்லை என்றும், அதற்குரிய நியாயமான காரணங்கள் என்ன என்று கட்சியின் பதில் பொதுச் செயலாளர் சத்தியலிங்கத்திடம் வினவியபோது,
‘இந்தத் தீர்மானம் கட்சியின் தேர்தல் நியமனக்குழுவினால் எடுக்கப்பட்ட தீர்மானமாகும். தேர்தலில் போட்டியிடுவதற்கு விருப்பம் தெரிவித்து அதிக எண்ணிக்கையான விண்ணப்பங்கள் வரும்போது, அவற்றை ஆராய்ந்து அதில் பொருத்தமான விண்ணப்பங்களை மாத்திரம் தெரிவுசெய்யவேண்டிய கட்டாயம் ஏற்படும்.
எனவே இம்முறை தேர்தலில் போட்டியிடவிருக்கும் வேட்பாளர்களைத் தெரிவுசெய்வதற்கான செயன்முறையொன்று நியமனக்குழுவினால் வகுக்கப்பட்டு, அதற்கு அமைவாகவே வேட்பாளர் தெரிவு இடம்பெற்றது.
எனவே இவ்வாறானதொரு பின்னணியில் சிலர் ஏன் தெரிவுசெய்யப்படவில்லை என்பதற்குத் தனித்தனியாகக் காரணம் கூறுவது சாத்தியமற்றதாகும்’ என்றார்.
தமிழ் அரசுக் கட்சியில் கடந்த முறை பாராளுமன்ற தேர்தலில் போட்டியிட்ட சசிகலா ரவிராஜ் இம்முறை ஜனநாயக தமிழ் தேசிய கூட்டணியில் போட்டியிட வேட்புமனுவில் கையொப்பமிட்டார்.
இந்நிலையில் மேலும் சிலர் கட்சியில் இருந்து விலகி வேறு தரப்புக்களுடன் இணைந்து பாராளுமன்ற தேர்தலில் போட்டியிடுவர் என தெரிவிக்கப்படுகிறது.
